آئی ایس ایس آئی نے “پاکستان فرسٹ سٹیٹ آف فریڈم رپورٹ 2026′ کے اجراء کی میزبانی کی
انسٹی ٹیوٹ آف اسٹریٹجک اسٹڈیز اسلام آباد (آئی ایس ایس آئی) نے مشال پاکستان کے اشتراک سے “پاکستان فرسٹ سٹیٹ آف فریڈم رپورٹ 2026” کے اجراء کی میزبانی کی۔ یہ ملک کی پہلی جامع قومی تشخیص ہے جو سیاسی، شہری، اقتصادی، ڈیجیٹل، قانونی اور سماجی آزادیوں کا جائزہ لیتی ہے۔
تقریب کے مہمانِ خصوصی بیرسٹر عقیل ملک، وزیرِ مملکت برائے قانون و انصاف نے پاکستان کی پہلی “سٹیٹ آف فریڈم رپورٹ” کے اجرا کا خیرمقدم کیا اور شواہد پر مبنی پالیسی سازی، شہری شمولیت، آئینی حکمرانی اور ادارہ جاتی جواب دہی کی اہمیت پر زور دیا۔ انہوں نے کہا کہ معروضی جائزے اور باخبر عوامی مکالمہ جمہوری اداروں کو مضبوط بنانے اور حکمرانی کے نتائج بہتر بنانے میں اہم کردار ادا کرتے ہیں۔ عوامی اعتماد اور جواب دہ اداروں کی اہمیت پر زور دیتے ہوئے انہوں نے کہا: “آزادی اس وقت مضبوط ہوتی ہے جب شہری خود کو سنا ہوا محسوس کریں، ادارے جواب دہ رہیں اور پالیسی سازی شواہد پر مبنی ہو۔ یہ رپورٹ اس قومی مقصد کی جانب ایک اہم پیش رفت ہے۔” انہوں نے مزید کہا کہ پاکستان کا آئینی ڈھانچہ بنیادی حقوق کے وسیع تحفظات فراہم کرتا ہے اور انصاف تک رسائی، شفافیت، جواب دہی اور شہری شرکت کو مضبوط بنانے کے لیے قانونی و ادارہ جاتی اصلاحات جاری ہیں۔ انہوں نے جامع حکمرانی کے ماحول کے فروغ پر بھی زور دیا جہاں شہری قومی ترقی اور پالیسی سازی کے عمل میں مؤثر کردار ادا کر سکیں۔
اپنے خیرمقدمی کلمات میں آئی ایس ایس آئی کے چیئرمین بورڈ آف گورنرز سفیر خالد محمود نے مشال پاکستان کی جانب سے پاکستان میں آزادی کی حالت پر جامع مطالعہ کرنے کی کاوش کو سراہا۔ رپورٹ کے نتائج کا حوالہ دیتے ہوئے انہوں نے پاکستان میں بڑھتی ہوئی ڈیجیٹل تبدیلی، کاروباری ماحول کی وسعت اور قومی معیشت میں آئی ٹی سیکٹر کے بڑھتے ہوئے حصے کو اجاگر کیا۔ انہوں نے کہا کہ رپورٹ اقتصادی شرکت، کاروباری سہولت کاری اور خواتین کے بااختیار بنانے کے حوالے سے حوصلہ افزا تاثرات پیش کرتی ہے، جبکہ اقتصادی تحفظ، حکمرانی کی کارکردگی اور ادارہ جاتی ردعمل جیسے شعبوں میں مسلسل پالیسی توجہ کی ضرورت بھی اجاگر کرتی ہے۔ انہوں نے زور دیا کہ آزادی کا کثیر جہتی فہم اداروں کو مضبوط بنانے اور حکمرانی کے نتائج بہتر بنانے کے لیے ایک قیمتی فریم ورک فراہم کرتا ہے۔
رپورٹ پیش کرتے ہوئے مشال پاکستان کے چیف ایگزیکٹو آفیسر اور شریک مصنف جناب عامر جہانگیر نے اسے پاکستان کی آزادی کے جائزے کے لیے اپنی آئینی، ادارہ جاتی، اقتصادی اور سماجی حقیقتوں کی بنیاد پر پہلی مقامی، شواہد پر مبنی کاوش قرار دیا۔ انہوں نے بتایا کہ رپورٹ آزادی کے چھ اہم پہلوؤں کا جائزہ لیتی ہے: سیاسی آزادی، شہری آزادیاں، قانون کی حکمرانی اور انصاف تک رسائی، اقتصادی آزادی، ڈیجیٹل آزادی اور معلومات تک رسائی، اور سماجی شمولیت، صنفی مساوات اور عوامی اعتماد۔ قانونی تجزیے، ادارہ جاتی اشاریوں، ماہرین سے مشاورت اور تقریباً 2,000 افراد پر مشتمل ملک گیر سروے کی بنیاد پر رپورٹ آزادی اور حکمرانی پر پاکستان کا پہلا قومی معیار قائم کرتی ہے۔ انہوں نے اہم نتائج پیش کیے، جن میں 77 فیصد جواب دہندگان کا یہ ماننا شامل ہے کہ شہری اپنے پیشے کے انتخاب میں آزاد ہیں، 75 فیصد کا خیال ہے کہ کاروبار غیر ضروری حکومتی مداخلت کے بغیر چل رہے ہیں، اور 75 فیصد خواتین کے مواقع اور بااختیار بنانے کے حوالے سے مثبت رائے رکھتے ہیں۔ انہوں نے پاکستان کی تیز رفتار ڈیجیٹل تبدیلی، آئی ٹی سیکٹر کی توسیع اور معلومات کی ترسیل و شہری شرکت کے لیے ڈیجیٹل پلیٹ فارمز پر بڑھتے ہوئے انحصار کو بھی اجاگر کیا۔
پارلیمنٹیرینز کمیشن برائے انسانی حقوق (پی سی ایچ آر) کے ایگزیکٹو ڈائریکٹر جناب شفیق چوہدری نے عوامی اعتماد کی تعمیر میں ادارہ جاتی انصاف، حقوق کے تحفظ اور مؤثر حکمرانی کے ڈھانچوں کی اہمیت پر زور دیا۔ انہوں نے کہا کہ شفافیت، انصاف اور مساوی مواقع کے لیے مسلسل کوشیں ایک آزاد اور ترقی پسند معاشرے کے فروغ کے لیے ناگزیر ہیں۔
آزاد جموں و کشمیر کی سابق وزیر برائے ترقیِ نسواں و سماجی بہبود اور آئزن ہاور فیلو محترمہ فرزانہ یعقوب نے خواتین کے بااختیار بنانے، سماجی شمولیت اور مواقع تک مساوی رسائی کی اہمیت اجاگر کی۔ انہوں نے زور دیا کہ پائیدار قومی ترقی کے حصول کے لیے خواتین اور محروم طبقات کی اقتصادی، سماجی اور سیاسی شعبوں میں شرکت کو مضبوط بنانا ضروری ہے۔
ابتدائی کلمات میں چائنا-پاکستان اسٹڈی سینٹر (سی پی ایس سی) کے ڈائریکٹر ڈاکٹر طلعت شبیر نے مشال پاکستان کی جانب سے شواہد پر مبنی اس اہم اقدام کو سراہا جو باخبر پالیسی سازی اور قومی مباحثے میں معاون ہے۔ انہوں نے کہا کہ عصری دور میں آزادی کا تصور آئینی ضمانتوں سے آگے بڑھ کر اقتصادی مواقع، ڈیجیٹل رسائی، سماجی شمولیت، ادارہ جاتی انصاف، سلامتی اور عوامی اعتماد پر محیط ہے۔
رپورٹ کے اجراء کی تقریب میں پارلیمنٹیرینز، سفارت کاروں، ماہرینِ تعلیم، میڈیا نمائندگان، سول سوسائٹی کے ارکان، محققین اور پالیسی ماہرین نے شرکت کی اور پاکستان میں آزادی، حکمرانی اور عوامی اعتماد کے بدلتے ہوئے ابعاد پر تبادلہ خیال کیا۔
